ЭХЭМҮТ 90 жилийнхээ, Хүүхдийн мэс заслын 65 жилийн хөгжлийн түүхэнд анх удаа дэлхийн жишгийн 1-р зэрэглэлийн мэс заслын хэсэгтэй боллоо. Монгол Улсын Засгийн газар, Сангийн яам, Эрүүл мэндийн яамны дэмжлэг, улсын төсвийн 1 тэрбум төгрөгийн хөрөнгө оруулалтаар хагалгааны хоёр өрөө, 8 туслах өрөө, нийт 10 өрөө бүхий хагалгааны хэсгийг ашиглалтад албан ёсоор хүлээн авлаа.
Мэс заслын хэсэгтэй болсноор өвчтөний аюулгүй байдал зуун хувь хангадаж байгаа гэдгийг эмч, мэргжилтнүүд онцолж байв. Мэс заслын өрөөнөөс сургалт, хурлын танхим руу хагалгааг шууд дамжуулан Олон улсын сургалт амжилттай хийлээ. Эмч нар олон улсын багтай хамтран төрөөд 6 хонож байгаагаас 12 настай 6 хүүхдэд хүнд мэс заслыг амжилттай хийлээ.
Энэхүү хэсэг нь анх удаа орчин үеийн шаардлагын түвшинд хүрсэн гэдгээрээ давуу тал онцлогтой. ЭХЭМҮТ-д 2018 онд 15663 өвчтөнд мэс заслын эмчилгээ хийгдсэний 72.4 хувийг хүүхдийн төрөлжсөн мэс заслын тусламж үйлчилгээ эзэлж байна. Энэхүү мэс заслын вакум өрөөнүүдийн хана, тааз, шал болон бусад дагалдах тоног төхөөрөмжүүд нь олон улсад хүлээн зөвшөөрөгдсөн тоосжилт үүсдэггүй, цахилгаанждаггүй, нянгийн эсрэг бактер үрждэггүй, цэвэрлэхэд хялбар тусгай зориулалтын материалаар хийгджээ.
Хүүхдийн вакумжсан мэс заслын хэсэг нь иж бүрэн тоноглогдсон мэс заслын өрөө, цэвэр багаж, материалын өрөө гээд, бохир зүйлсийг гаргах өрөө, гар угаах хэсэг хувцас солих өрөө, усанд орох өрөө, техникийн өрөө болон коридорын хэсэг гэсэн зохион байгуулалттай. Вакумжсан мэс заслын өрөөний агаарыг 4 шатлалт шүүлтүүрээр шүүж, бактерийг устган халдваргүйжүүлдэг хепафильтер суурилагдсан бөгөөд түүний тусламжтай агаарыг тасралтгүй 99.99% цэвэршүүлнэ. Цахилгаан, дулаан хангамж, холбоо дуудлага, интернетийн сүлжээ, эмнэлгийн хийн систем, хяналтын камер зэрэг төхөөрөмжөөр тоноглогдсон, мэс заслын өрөөний дотроос тохируулах бүрэн боломжтой хяналтын самбартай юм. Мөн эмч ажилчдад зориулагдсан хувцас солих өрөөг усанд орох хэсэгтэй шийдсэн нь ажилчдын орчин нөхцөл сайжирч, тэдэнд ажиллах урам зориг, эрч хүч өгч байна. Дашрамд дуулгахад, ЭХЭМҮТ нь 2019 онд “Эрүүл мэндийн тусламж үйлчилгээний чанар, аюулгүй байдлыг бүрэн хангаж, эрсдэлгүй ажиллацгаая” уриаг дэвшүүлэн ажиллаж байна.
