Нийслэлд 5 хүн угаарын хийнд хордож амь насаа алдсантай холбогдуулан НИТХ дахь АН-ын бүлгээс мэдээлэл хийлээ. АН-ын бүлгийн ахлагч Ц.Баатархүү “Нийслэл Улаанбаатар хотод нэн тулгамдаж байгаа асуудлаар ИТХ-ны төлөөлөгчид санаа бодлоо нэгтгэж байна. Үүнд нам, улс төр гэсэн асуудал байхгүй. Хүмүүс угаартаж амь насаа алдсан асуудлаар албан тушаалтнуудын өгч байгаа мэдээлэл зөрүүтэй байна.
Ийм учраас нийслэлийн ИТХ-ын төлөөлөгчид нийлж “Нийтийн сонсгол” хийх шаардлагатай гэж үзсэн. Ингэвэл үйлдвэрлэгчид, шийдвэр гаргагчид, хэрэглэгчид, хохирч байгаа иргэд, эрдэмтэн судлаачид, мэргэжлийн холбоод, хэвлэл мэдээллийнхэн нэг ижил мэдээлэлтэй болж алдаа дутагдлыг засах, шийдэл гаргахад бодитоор анхаарч чадна.
Төлөөлөгчид “Мэргэжлийн лабораториудаар түлшнийхээ дээжийг шинжлүүлсэн үү” гэж асуухад “Шинжлүүлж байгаа. Хариу сайхан гарсан” гэдэг. Нийслэлийн ИТХ-ын төлөөлөгчдийн дөрөвний нэг нь өнөөдөр гарын үсгээ зураад нийтийн сонсгол хийх хүсэлтээ өргөн барьсан.
Нийслэлийн иргэдийг төлөөлж сонгогдсон төлөөлөгчид улсын нууцад хамруулахаас бусад бүх мэдээлэл нээлттэй байх зарчмыг баримтлан Нийтийн сонсголын тухай хуульд заасны дагуу хүсэлт гаргаж байгаа юм. Тиймээс холбогдох газруудаас энэ сарын 23-нд нийтийн сонсголыг зохион байгуулахыг шаардаж байна гэлээ.
