МҮБХ-ны маргаан эцэс төгсгөлгүй үргэлжилсээр байна. Сэргээшийн шинжилгээнд бүдэрсэн нэр бүхий бөхчүүдийн барилдах эрхийг МҮБХ-ны Тэргүүлэгчид 2 хүртэл жилээр хассан байдаг. Гэтэл дараа нь Баянзүрх дүүргийн Иргэний хэргийн анхан шатны шүүхээс нэр бүхий бөхчүүдийн барилдах эрхийг хассан МҮБХ-ны Тэргүүлэгчдэд эрх зүйн чадамж байхгүй, гаргасан шийдвэр нь хүчингүй хэмээн тогтоосон байдаг.
Үүний дараа улсын гарди Ө.Бат-Орших тэргүүтэй барилдах эрхээ 2 жилээр хасуулсан бөхчүүдийн барилдах эрхийг сэргээх шаардлага үүсэж, МҮБХ-ны Тэргүүлэгчид тогтоол гаргав. Харин энэ сарын 3-ны өдөр сэргээшийн шинжилгээнд бүдэрсэн бөхчүүдийн барилдах эрхийг хассан хугацааг хүчинтэй хэвээр үлдээх тогтоол баталжээ.
Өөрөөр хэлбэл, улсын гарди Ө.Бат-Орших, улсын заан Б.Пүрэвсайхан, улсын начин Э.Даш нарын нэр бүхий бөхчүүдийг барилдуулахгүй гэж шийджээ. Одоо энэ тогтоолыг шүүхэд өгвөл бас дахиад л хүчингүй болох магадлалтай. МҮБХ болон бөхчүүдийг тойрсон маргаан цааш үргэлжлэх нь тодорхой боллоо.
