УИХ-ын гишүүн О.Баасанхүү УИХ дахь АН-ын зөвлөлд орно гэж жиргэжээ. Тэрбээр УИХ-ын чуулганы нэгдсэн хуралдаанаар баталсан шинэ Эрүүгийн хуулийг эсэргүүцэж, өөрчлөлт оруулахаар ажиллана гэдгээ мэдэгдээд буй.
Энэ тухай эрхэм гишүүн О.Баасанхүү твиттер хуудастаа “Олигтой ч сөрөг хүчингүй энэ үед АН-д орж сөрөг хүчний хүчийг нэмэгдүүлдэг юм билүү. Шинэ Эрүүгийн хуульд эх орноосоо урвагчдыг өршөөсөн байна” хэмээн жиргэжээ.
Харин УИХ дахь АН-ын зөвлөлийн дарга Д.Эрдэнэбат энэ мэдээллийг үгүйсгээгүй бөгөөд одоогоор албан бичгээр хандаагүй байгааг хэлсэн. МАХН-аас нэр дэвшиж УИХ-л сонгогдсон О.Баасанхүү гишүүн АН-д элсэж магадгүй тухай яриа 2 жилийн өмнөөс гарч байв.
Ямартай ч гишүүн О.Баасанхүү АН-ын зөвлөлтэй хамтарч сөрөг хүчний үүрэг гүйцэтгэхээр шийдсэн нь тодорхой боллоо. Харин МАХН-ын гишүүнчлэлээс гарч АН-д элсэх үү, үгүй юү гэдэг нь тодорхойгүй хэвээр үлдлээ.
