Үндсэн хуулийн цэцийн өнгөрсөн сарын 27-ны дунд суудлын хуралдаанаар Хэнтий аймгийн 42 дугаар тойргийн нөхөн сонгуулийн тов, зардлыг тогтоосон УИХ-ын 22, 23 дугаар тогтоол хууль зөрчсөн гэж дүгнэсэн. Тодруулбал, УИХ-ын 23 дугаар тогтоолд, сонгуульд шаардлагатай хөрөнгийг Засгийн газрын нөөц сангаас гаргахаар шийдвэрлэсэн ч Сонгуулийн тухай хуулиар, сонгуулийн зардлыг улсын төсвөөс гаргана гэж хуульчилсан байдаг. мөн 22 дугаар тогтоолоор нөхөн сонгуулийг ирэх сарын 30-нд товлосон бол хуулиар, гишүүний бүрэн эрхийн хугацаа дуусахаас нэг жилийн дотор сонгууль зохион байгуулахгүй байхыг нарийвчлан тусгасан. Тиймээс УИХ-ын 22, 23 дугаар тогтоолыг хууль зөрчсөн хэмээн Үндсэн хуулийн цэц үзсэн юм. Тэгвэл УИХ-ын Төрийн байгуулалтын байнгын хорооны өнөөдрийн хуралдаанаар Үндсэн хуулийн цэцийн дээрх дүгнэлтийг хэлэлцээд, хүлээн авах боломжгүй хэмээн үзлээ.
УИХ-ын Төрийн байгуулалтын байнгын хорооны дарга Д.Лүндээжанцан, Цэцийн дунд суудлын хуралд УИХ-ыг төлөөлөн оролцсон. Тэрээр гэнэтийн осол, эрсдлийн үед зарцуулах ёстой улсын төсөв болон гадаадын тусламжаас бүрддэг Засгийн газрын нөөц сангийн хөрөнгөнөөс нөхөн сонгууль явуулахаар шийдвэрлэсэн нь буруу хэмээн цэц үзсэнийг УИХ-д энэ үеэр дамжууллаа.
Хуралдааны төгсгөлд санал хураахад Үндсэн хуулийн цэцийн дүгнэлтийг хүлээн авахаас байнгын хорооны гишүүд 100 хувь татгалзсан юм. Уг асуудлыг Хууль зүйн байнгын хороогоор дахин хэлэлцсэний дараа УИХ-ын чуулганы нэгдсэн хуралдаанаар эцэслэн шийднэ.
