Ромын пап Франциск АНУ-Мексикийн хилийн дагуу хана барьж эхэлснийг буруушааж буйгаа Мексикийн телевизийн ярилцлагад орох үеэрээ илэрхийлжээ. Тэрээр, Берлиний хана ямар олон хүнд уй гуниг, сэтгэлийн зовлон авчирсныг сануулах бэлээхэн түүх байхад дахин ийм алдаа хийж байгаад харамсч байна. Энэ бол хүүхдийг эцэг эхээс салгаж байгаатай л адил байгалийн хуулийг зөрчсөн хамгийн харгис үйлдэл гэж дүгнэж буйгаа хэлсэн байна.
Трамп юугаа, хэнээс хамгаалах гээд байгаа юм бол, би ойлгохгүй байна. Эх орноо юу, эдийн засгаа юу, эсвэл бүр өөр онцгой зүйлийг хамгаалах гээд байгаа юм уу гэж тэрээр гайхширч буйгаа онцолжээ.
Энэ бүх санал бодлоо Доналд Трамптай нүүр тулж хэлэхэд бэлэн байгаагаа ч хэлсэн байна.
Хана барих ажилд гар бие оролцож буй хүмүүс өөрсдийнхөө эсрэг хана барьж байгаа гэсэн үг гээд тэдгээр буруу үйлдэл хийж буй хүмүүсийн өмнөөс залбирах болно гэдгээ хэллээ.
