ХУД-ийн 15 дугаар сругуульд 38 хүүхэд, нэг багш халдварт сүрьеэ өвчнөөр өвчилсөн, 200 гаруй хүүхэд халдвар авсан нь тогтоогдож нийгэмд нэлээд шуугиан, айдас дагуулсан. Тэгвэл ХӨСҮТ-ийн Сүрьеэгийн тандалт судалгааны алба, сүрьеэгийн орон нутаг дахь диспансерууд үндэсний хэмжээнд эхний ээлжинд ЕБС-иудыг сүрьеэгийн урьдчилан сэргийлэх үзлэгт хамруулж байгаа ажээ.
Үүнээс гадна багш нар ямар ч төлбөр, мөнгө төлөхгүй урьдчилан сэргийлэх үзлэгт орох бүрэн боломжтой гэж Эрүүл мэндийн яамныхан мэдээллээ. Учир нь 2018 оны аравдугаар сарын 1-нээс сүрьеэгээс урьдчилан сэргийлэх үзлэгийг улсын хэмжээнд Эрүүл мэндийн даатгалын сангаас санхүүжүүлж байгаа аж.
Багш нар урьдчилан сэргийлэх үзлэгт орж, халдварт өвчтэй эсэхээ магадлуулж байж ажилд ордог ч 15 дугаар сургуулийн дээрх багш 2015 онд орон нутгаас хотод шилжиж ирээд шинжилгээний хуурамч бичиг баримт бүрдүүлж, дээрх сургуульд ажилд орсон байжээ. Тухайн багш эмчилгээгээ тасалсан. Тиймээс орон нутгаасаа ялгаварлан гадуурхагдаж, шилжсэн байж магадгүй гэсэн дүгнэлтийг мэргэжлийн хүмүүс хийсэн байна.
