2009 оноос хойш уламжлал болон зохиогдож байгаа “Silk way” ралли нь авто спортын дэлхийн томоохон бартаат замын уралдаан юм. Тэсвэр тэвчээр шалгасан эр зоригийн энэхүү уралдаанд дэлхийн алдартай тамирчид хурд сорин өрсөлддөгөөрөө онцлогтой. Энэ жил “Silk way-2019” ралли нь Монгол Улсын нутгаар анх удаа дайран өнгөрөх аж. Ралли ирэх 7 дугаар сарын 06-нд ОХУ-н нутгаас гараагаа эхэлж, Монгол Улсын нутгаар дайран 7 дугаар сарын 16-нд БНХАУ-ын нутагт өндөрлөнө. 30 гаруй орны 300 орчим баг тамирчин оролцох ралли уралдааныг хэвлэл мэдээллийн 150 сувгаар орон орны үзэгчид сэтгэл догдлон үздэг байна. Уралдаанд Монгол орноо төлөөлөн оролцох авто спортын тамирчид, механикийн баг, хамт олонтойгоо бүртгүүлээд эхэлжээ.
