“Эрдэнэс Монгол” ХХК-ийн Гүйцэтгэх захирал П.Ганхүү БНФУ-ын Төрийн өмчит компани болох “Орано” группийн Тэргүүн гүйцэтгэх захирал Николас Мас тэргүүтэй төлөөлөгчдийг хүлээн авч уулзав. “Орано” групп нь дэлхийн таван тивийн улсад уул уурхайн үйл ажиллагаа явуулдаг бөгөөд Канад, Казахстан, Монгол, Нигер, Намиби зэрэг оронд ураны олборлолт, хайгуулын төсөл хэрэгжүүлдэг байна.
Тус группийн нийт хувьцааны 92,2 хувийг Францын Засгийн газар нь эзэмшдэг гэдгийг ноён Николас Мас уулзалтын эхэнд танилцуулсан. Манай улсад тус групп “Арева Монгол” ХХК, “Кожеговь” ХХК болон Монгол – Францын хамтарсан “Бадрах Энержи” ХХК-иар дамжуулан үйл ажиллагаа явуулдаг. “Бадрах Энержи” ХХК-ийн хэрэгжүүлж буй Дорноговь аймгийн Зүүнбаян багийн нутагт орших ураны Зөөвч-Овоо, Дулаан-Уул ордуудын төслийн хувьд манай улсын стратегийн чухал ач холбогдолтой, хоёр орны хамтын ажиллагаанд томоохон байр суурь эзэлж буйг Гүйцэтгэх захирал П.Ганхүү онцоллоо.
Цаашид талууд нарийвчилсан судалгааны ажил, бүтээн байгуулалт зэрэгт анхаарч ажиллахаар тохирлоо.
