Монгол Улс анхныхаа хиймэл дагуулыг сансарт хөөргөлөө. ‘Мазаалай’ нэртэй энэхүү хиймэл дагуул Улаанбаатарын цагаар үүрийн 5 цагийн үед АНУ-ын Флорида мужийн Кеннеди сансрын төвөөс дэлхийг орхин сансарт хөөрчээ. Хиймэл дагуулыг “SpaceX” компанийн Falcon ес пуужингаар хөөргөсөн бөгөөд хиймэл дагуул өнөөдөр Олон Улсын сансрын станцид хүрэх юм байна. Уг хиймэл дагуулыг МУИС, Япон улсын Кюүшюүгийн технологийн институттэй хамтран “BIRDS” хэмээх төслийн хүрээнд бүтээсэн аж.
Анхны бага оврын ‘Мазаалай’ хиймэл дагуул дэлхийгээс 400 км зайтайгаар цэнхэр гаригийг тойрч хэд хэдэн шинэ туршилтыг хийх юм. Тодруудбал, сансарт орчныхоо агаарын нягт, цацраг идэвхийн байдлыг тодорхойлох, хиймэл дагуулын байрлалыг оролцож буй орнуудын газрын станцын тусламжтайгаар тодорхойлж сүлжээ зохион байгуулах, соронзон бүртгэгч болон хурдан камерын тусламжтайгаар пассив навигаци хийх аж. Мөн нарийвчлал нь 100 метр байх хэмжээтэй зураг авч илгээх юм байна.
