Урин дулааны улирал эхэлж, зуны аагим халуун өдрүүд үргэлжилж байна. Өнөөдөр л гэхэд гадаа 30 хэмийн халуун байх нь.
30 хэмийн халуун өдөр автомашинаа гадаа аравхан минут орхиход машин доторхи температур 70 хэм болдог ажээ. Үнэхээр аюултай. Энэ тоог дэлхийн олон улс оронд хэмжээд тогтоосон байдаг бөгөөд ийм халуунд машинд үлдсэн хүүхдийн тархинд 10-15-хан минутын дотор цус харвах аюултай байдаг аж. Зурган дээрээс та бүхэн бодит байдал ямар болохыг харж байгаа биз. Машин дотор хайруулын тавганд өндөг шарах хэмжээний халуун байдаг гээд төсөөлөөд үз дээ.
Машиндаа хүүхдээ цоожилж үлдээсний улмаас бяцхан үрс амь нас, эрүүл мэндээрээ хохирч байсан тохиолдлууд дэлхийд олон гардаг. Манайд ч 2015 онд ийм тохиолдол гарч цагдаагийн 2 ажилтан ухаан алдсан 2 хүүхдийг аварч байсан билээ.
Хүүхдийн эрхийг зөрчсөн, амь нас, эрүүл мэндээр нь хохироосон тохиолдолд эцэг эхэд нь Эрүүгийн хуулийн 118-р зүйл ангиар эрүүгийн хэрэг үүсгэдэг байна.
