УИХ дахь МАН-ын бүлэг өнөөдөр тогтсон уламжлал ёсоор хуралдав. Хурлын дараа тус бүлгийн дарга Д.Тогтохсүрэн мэдээлэл өгөхдөө “Ирэх оны дөрөвдүгээр сарын 1-нээс тэтгэвэр, тэтгэмжийг 100 мянган төгрөгөөр нэмэгдүүлэх улс төрийн шийдвэрийг бүлэг гаргалаа. Уг нь инфяцтай уялдуулж, тэтгэврийг 10 хувиар нэмэхээр 2024 оны улсын төсөвт Засгийн газраас тусгаад байсан. Нийт тэтгэвэр авагчдын 70 хувь хувь нь бага тэтгэвэр авч байгаа учраас төдийлэн нэмэгдэл болж чадахгүй байна. Тиймээс 100 мянган төгрөгөөр нэмэх нь зүйтэй гэдэг саналыг Ерөнхий сайд Л.Оюун-Эрдэнэ гаргасан. Тэтгэврийн бодит хэмжээг нэмэгдүүлэх шаардлагатай байгаа учраас ажлын хэсэг санал оруулаад байна” гэлээ.
Юутай ч Ерөнхий сайд Л.Оюун-Эрдэнэ ахмад настнуудын тэтгэврийг 100 мянган төгрөгөөр нэмэх саналаа УИХ дахь намын бүлэгтээ өнөөдөр танилцуулжээ. Түүний энэхүү саналыг МАН-ын бүлэг олонхоороо дэмжсэн байна. Гэхдээ энэ бол эцсийн шийдвэр биш. 2024 оны төсвийн төслийг УИХ-аар эцэслэн батална. Наана нь Байнгын хороо, чуулганы нэгдсэн хуралдаанаар хэлэлцүүлэг явуулах учиртай. Бүлгийнхээ гаргасан улс төрийн шийдвэрийг УИХ-ын гишүүд дэмжих үү, эс дэмжих үү.
