Эцэг эхийн дарамтыг хэрээс хэтэрсэн хэмээн Солонгосын багш нар ажил хаялт зарлалаа

Бага сургуулийн багш 23 настай эмэгтэй сургууль дээрээ амиа хорлож нас барсан  хэрэг Солонгост гарсан. Түүнийг  эцэг эхчүүдийн дарамтнаас болж ийм байдалд хүрсэн гэх урьдчилсан таамаг байгаа бөгөөд энэхүү эмгэнэлт явдал Өмнөд Солонгосын бага сургуулийн багш нарын уур бухимдлыг төрүүлж олон мянган  багш нар  даваа гарагт ажил хаялт зарлалаа. Сүүлийн зургаан долоо хоногийн турш Сөүл хотод хэдэн арван мянган багш нар жагсч эсэргүүцлээ илэрхийлсэн бол ийнхүү тэмцлээ шат ахиулж ажил хаяжээ. Тэд багш нарын  ажлын байран дахь ажиллх нөхцөл,  хамгаалалтыг сайжруулахыг шаардаж  байгаа юм.

Талийгаач багш нэг  жил гаруй багшилсан  бөгөөд өдрийн цагаар болон амралтын өдрүүдээр дуудаж, тасралтгүй, шударга бусаар гомдоллодог эцэг эхчүүдийн дарамт хэцүү байгаа талаар  өдрийн тэмдэглэлдээ бичсэн байжээ.  Тухайлбал амиа хорлохоосоо хэдэн сарын өмнө   нэг  сурагч өөр хүүхдийн толгойг харандаагаар хатгасан хэрэг гарч  эцэг эхчүүдээс багш нэлээд шүүмжлэл авсан ажээ.

Багш нар хүүхэд хүчирхийлэгч гэж нэрлүүлэхээс айж эмээж сурагчдаа хүмүүжүүлэх боломжгүй, бие бие рүүгээ дайрах үед хөндлөнгөөс оролцоход хүндрэлтэй болсон. Хүүхэд  хүчирхийллийн асуудалд өртсөн багш нарыг ажлаас нь шууд халахаар заасан 2014 оны хүүхдийн халамжийн тухай хуулийг эцэг эхчүүд буруугаар ашигладаг  гэж багш нар үзэж байна.

Тухайлбал, нэг багш  хүүхдийг нь өглөө бүр утсаар сэрээх хүсэлтийг хүлээн аваагүйн улмаас эцэг  эх нь гомдол гаргаж  байсан. Ангийнхаа найзыг хайчаар зүссэн хүүд өгсөн урамшууллын наалтаа багш буцааж авсны дараа эцэг эхээс гомдол гаргасан. Багш нар амар  тайван хичээл зааж чадахаа болих хэмжээнд хүрч багш нар хүчгүйдэж байна гэж жагсаалд оролцож буй БНСУ-ын багш нар хэлж байна.

2023 оны судалгаагаар багш нарын дөрөвний нэг хүрэхгүй хувь нь (24%) ажилдаа сэтгэл хангалуун байгаа гэсэн судалгаа гарсан бөгөөд ихэнх нь мэргэжлээ орхих талаар бодож байгаа гэсэн дүгнэлт гарчээ. БНСУ-ын Засгийн газар ч нөхцөл байдлыг хүлээн зөвшөөрч багш нар хичээлд саад учруулсан сурагчийг ангиас гаргаж, шаардлагатай бол хүндэрсэн нөхцөл байдлыг таслан зогсоох эрхтэй гэж багш нарт зориулан шинэ удирдамж гаргажээ. Мөн эцэг эхчүүд багш нартай уулзах өдөр, цагийг урьдчилан тохиролцох ёстой, багш нар ажлын дараа уулзахаас татгалзаж болно гэсэн шийдвэр гаргажээ. Өмнөд Солонгосын Боловсролын сайд Ли Жү Хо эдгээр арга хэмжээ нь “сургуулиудыг байх ёстой хэм хэмжээнд нь аваачна” гэж найдаж байгаагаа хэлжээ.