Танхимын барилдааны дундуур авсан явцын шинжилгээнээс хоёр бөх допинг хэрэглэсэн нь тогтоогдсон байна. Увс аймгийн харьяат харцага Ц.Мөнхбаяр, аймгийн арслан Б.Өсөхбаяр нарын шинжилгээнээс допингийн төрлийн бодис илэрчээ.
ТМҮБХ-ны тэргүүлэгчид хуралдаж явцын шинжилгээнээс нь допингийн төрлийн бодис илэрсэн бөхчүүдэд ямар арга хэмжээ авах талаар шийдвэрлэжээ. МҮБХ-ны шинэ дүрэмд заасны дагуу улсын харцага Ц.Мөнхбаяр болон аймгийн арслан Б.Өсөхбаяр нарын барилдах эрхийг дөрвөн жилийн хугацаатай хасахаар шийдвэрлэжээ.
Цагаан сарын барилдааны үеэр авсан шинжилгээнээс нь дахин допингийн төрлийн бодис илэрсэн улсын арслан Э.Оюунболдын барилдах эрхийг 8 жилийн хугацаатай хасах шийтгэл ногдуулжээ.
