“Хөгжлийн банк”-ны гэх хэрэгт холбогдон шүүгдэгчийн ширээнд суусан 80 хүн, дөрвөн компанийн гэм буруутай эсэхийг дэнслэх хурал ажлын 47 хоног үргэлжилж дууслаа. Сүүлийн 2-3 өдөр 80 хүн ээлжилж шүүхэд үгээ хэлэв. Ялладагчаар татагдан шүүгдэгчээр суусан УИХ-ын гишүүд бүгд л өөрсдийгөө гэм буруугүй гэж өмгөөлөв. Гэхдээ тэд юу гэж ярьсан ч, уяраасан ч шүүх эцсийн шийдвэр гаргана. Бараг хоёр сар үргэлжилсэн, шүүгдэгчид нь танхимд багтахгүй олон байсан шүүх хурал өмнө нь тийм ч олон болж байсангүй. Хөгжлийн банкыг тоносон бүлэглэлүүдийн хуудуутай үйлдэл, учруулсан хохирлыг олон нийт нээлттэй үзлээ, сонслоо.
УИХ-ын гишүүд, Хөгжлийн банкны албан тушаалтан аснууд бүгд хэрэг хийгээгүй гэж өөрсдийгөө хаацайласан. Тэд өөрсдийгөө өмгөөлж үг хэлэх эрхтэй ч нөгөө талдаа Хөгжлийн банкны зээлийн 80 хувь нь эргэж төлөгдөхөөргүй болж, улсынхаа эдийн засгийг татаж унагах, дампууруулах хэмжээнд аваачсан байсныг мартаж боломгүй. Сүхбаатар дүүргийн Эрүүгийн хэргийн анхан шатны шүүхийн шүүх бүрэлдэхүүн буюу ерөнхий шүүгч Ж.Болдбаатар, шүүгч Б.Батсайхан, А.Мөнхсайхан нар зөвлөлдөж, шүүгдэгчдийн гэм буруутай эсэхийг нь шийдвэрлэнэ.. Зургаадугаар сарын 26-ны 14.00 цагт тэд дүгнэлтээ танилцуулах юм.
