Сэлэнгэ аймгийн Зүүнбүрэн сумын нутаг дэвсгэрт машинаараа хүн дайрах нь гэсэн дуудлага цагдаагийн байгууллагад ирсэн байдаг. “Гацуурт” ХХК-ийн захирал, хөдөлмөрийн баатар Л.Чинбат өөрийн адууг хөөлөө гэж уурсахдаа сумын иргэдийг дайрна гэж сүрдүүлж, машинаараа хөөсөн нь тогтоогдсон. Түүнд Эрүүгийн хуулийн гурван зүйл, заалтын дагуу хэрэг бүртгэлтийн хэрэг нээх тогтоолыг прокуророос баталсан байна.
“Ланд круйзер-200” загварын 1559 УБЦ улсын дугаартай автомашинаар хөөж дайрч, гэмтээсэн үйлдэлд нь Эрүүгийн хуулийн ерөнхий ангийн 2.8-1 дэх хэсгийн журамлан тусгай ангийн 10.1-д заасан хүний амийг хөнөөхөөр завдсан, олон нийтийн сүлжээнд Сэлэнгэ аймгийн Зүүнбүрэн сумын иргэдийг малын хулгайч хэмээн гүтгэсэн хэмээн тус хуулийн 13.14-т зааснаар, нийтийн хэв журмыг зөрчиж бусдад хүч хэрэглэн, гэмтээж, хүний халдашгүй, чөлөөтэй байх, олон нийтийн амгалан тайван байдлыг алдагдуулсан гэх үндэслэлээр хэрэг бүртгэлтийн хэрэг нээсэн байна.
Автомашиныг зэвсгийн чанартай ашигласан, бусдын эрүүл мэндэд хохирол учрах нөхцөл байдалд хүргэсэн хэмээн хүндрүүлэх үндэслэл болж болохыг ч эх сурвалжууд мэдээлэв. Хөдөлмөрийн баатар Л.Чинбат энэ зүйл ангиар ял сонсвол доод тал нь 6-8 жил хоригдох нөхцөл байдал үүслээ гэсэн үг.
