“Louis Vuitton” тансаг загварын ордон хип хоп уран бүтээлч Фаррелл Уильямсыг эрэгтэй хувцасны бүтээлч захирлаар томилсноо мягмар гарагт зарлалаа. “Фаррелл Уильямс бол хөгжмөөс урлаг, хувцас загвар хүртэл бүтээлч ертөнцийг хамарсан алсын хараатай хүн бөгөөд сүүлийн 20 жилийн хугацаанд өөрийгөө бүх нийтийн соёлын бэлгэ тэмдэг болгож чадсан хүн ” гэж “Louis Vuitton” загварын ордоныхон онцолжээ. Өдгөө 49 настай дуучин Фаррелл13 Грэмми, хоёр Оскарт нэр дэвшсэн хөгжмийн ертөнцөд тогтсон супер одын нэг яах аргагүй мөн бөгөөд үүний зэрэгцээ олон жилийн турш загварын шоуны тэргүүн эгнээнд бичигдэж ирсэн загварлаг нэгэн юм.
Америкийн алдартай дизайнер,“Louis Vuitton”-ий бүтээлч захирал Виржил Абло 2021 оны арваннэгдүгээр сард хорт хавдраар нас барснаас хойш уг албан тушаал эзэнгүй байсан ч ийнхүү Фаррелл Аблогийн орыг залган ажиллах нь ээ. Тэрээр анхны коллекцио ирэх зургадугаар сард гаргах юм байна.
