Өнгөрсөн 14 хоногийн хугацаанд зам тээврийн осол, зөрчлийн талаар дуудлага мэдээлэл өссөн учраас ТЦА-наас зам тээврийн осол хэргээс урьдчилан сэргийлэх хяналт шалгалтыг эрчимжүүлэн ажиллажээ. Тухайлбал, 880 орчим цэгт 506 алба хаагч ажиллаж, 50 мянга гаруй зөрчил илрүүлж, телекамер буюу e-police аппликэйшнээр 43 мянга гаруй зөрчил илрүүлсэн байна.
Мөн согтуугаар тээврийн хэрэгсэл жолоодсон зөрчил нэмэгдсэн ба ийм зөрчил гаргасан 606 иргэнд арга хэмжээ авчээ. Согтууруулах ундаа хэрэглэсэн үедээ тээврийн хэрэгсэл жолоодож байгаа зөрчлийг таслан зогсоох, урьдчилан сэргийлэх зорилгоор баасан гараг бүр хяналт шалгалт хийнэ гэж ТЦА-ны Замын цагдаагийн газрын Нийслэлийн замын хөдөлгөөний хяналт, зохицуулалт хариуцсан дэд дарга Ч.Батболд хэлэв. Мөн сар шинийн баяр дөхөж буйтай холбогдуулан Зах, худалдааны төвийн өргөтгөсөн худалдаа зохион байгуулж байгаа газар нэмэлтээр цагдаагийн алба хаагч ажиллуулж байгаа ажээ.
