Сүүлийн өдрүүдэд Ховд аймгийн Мянгад сумын нутаг орших Халзан бүргэтэй ууланд газрын ховор элемент хайх лиценз олгосонтой холбогдуулан нутгийн малчид нутаг усныхаа төлөө тэмцэж эхэлсэн. Мянгадын мянган морьтон эсэргүүцлийн жагсаал зохион байгуулсан юм. Төрийн тахилгат Алтан хөхий хайрхан, Хар -Ус нуурын эко системд сөрөг нөлөө үзүүлж болзошгүй гэж нутгийнхан болгоомжилж, тэмцэлд нэгдсэн юм.
Газар нутгаа хамгаалсан, баруун бүсийн цэвэр усны нөөцөө хайрласан нутгийнхны тэмцэлд ХХААХҮ-ийн сайд асан З.Мэндсайхан хүч нэмжээ. Тэрбээр Ерөнхий сайд Л.Оюун-Эрдэнэтэй уулзаж Халзан бүргэтэйн асуудлаар тусгайлан 
ярилцжээ. Ерөнхий сайд Л.Оюун-Эрдэнэ нэгдүгээрт, Халзан бүргэтэй хайрханыг ухаж төнхөх бодлого Засгийн газарт байхгүй, хоёрдугаарт нутгийн зон олны эсэргүүцэл байгаа бол тэдний дуу хоолойг нэн тэргүүнд тавина гэдгээ илэрхийлжээ.
Ингээд Халзан бүргэтэйн асуудлаар тусгай Ажлын хэсэг томилж, газар дээр нь шуурхай ажиллуулах шийдэлд хүрчээ. Сайд асан З.Мэндсайхан амралтын өдрүүдээр Байгаль орчин, аялал жуулчлалын сайд Б.Бат-Эрдэнэтэй энэ асуудлаар уулзахаар болжээ. Юутай ч нутгийн хүмүүсийн санааг зовоосон Халзан бүргэтэй хайрханы асуудлыг Засгийн газар анхааралдаа авч, нутгийн хүмүүсийн санаа бодолд суурилж шийдвэрлэхээр боллоо. Сайд асан З.Мэндсайхан Ховд аймгийн Мянгад сумын уугуул учир энэ асуудалд онцгойлон санаа тавьсан юм байна.
