Ардын хувьсгалын түүхт 100, 101 жилийн ойн баяр наадмын хүчит бөхийн барилдаанд 1024 бөх зодоглосноос Ховд аймгийн Буянт сумын харьяат О.Хангай арав даван түрүүлсэн. Тэрбээр аварга цолныхоо талархал, хүндэтгэлийн наадмыг допингийн шинжилгээний хариу гарсны дараа тэмдэглэнэ гэдгээ мэдэгдсэн. Есдүгээр сарын 13-нд Ховд аймгийн төвд улсын аварга О.Хангайн цолны мялаалга наадам хийхээр товложээ.
О.Хангай аварга Ш.Ванчинхүү арслангаас хойш Ховд нутгаас 82 жилийн дараа төрийн наадамд түрүүлсэн бөх юм. Ш.Ванчинхүү арслан мөн Буянт сумын харьяат хүчтэн байсан билээ. О.Хангайг сумын заан, аймгийн арслан байхаас нь л эхэлж бөх сонирхогчид, нутгийн зон олон нь улсын цолонд хүрнэ гэж итгэж найдаж, хүлээж байв. Тэгвэл энэхүү урт удаан хүлээлт түүхт ойн наадмаар эцэс болж, О.Хангай нэг ч уналгүй арав даван түрүүлж, улсын аварга хэмээх цолыг хүртсэн 47 дахь, Ардын хувьсгалаас хойш төрсөн 25 дахь аварга цолтон болсон.
