2020 оны 9-р сарын 25-27-нд зохион байгуулсан Зүүн ази болон Номхон далайн орнуудын хүрээнд явагдсан Дасгалжуулагчийн онлайн семинарт Монголын Шатрын Холбооны Дасгалжуулагчдын зөвлөлийн саналаар Азийн Шатрын Холбоо болон Дэлхийн Шатрын Холбооны Хөгжлийн сангийн тэтгэлгээр Их мастер Б.Мөнгөнтуул оролцож шалгалтаа амжилттай өгснөөр ДШХ-ны Дасгалжуулагч /FIDE Trainer-FT/ цолны болзол хангалаа.
Уг семинарыг Дэлхийн шилдэг дасгалжуулагчид болох ДШХ-ны Ахлах дасгалжуулагч Эугенио Торре, Деян Божков, Меликсет Хачян, Джэйсон Гонсалес шахмат, Вишал Сарин, Еспер Халл нар удирдан явууллаа. 2020 оны 4-р сарын 24-26-нд зохион байгуулсан Зүүн ази болон Номхон далайн орнуудын хүрээнд явагдсан Дасгалжуулагчийн онлайн семинарт Их мастер А.Энхтуул оролцож шалгалтаа амжилттай өгсөнөөр ДШХ-ны Дасгалжуулагч /FIDE Trainer-FT/ цолтой болсон билээ.
Дэлхийн Шатрын Холбооноос зохион байгуулагддаг дасгалжуулагчийн семинарт сууж шалгалтад тэнцсэнээр олгодог Дасгалжуулагчийн цолыг дараах байдлаар эрэмбэлдэг бөгөөд тухайн цолонд тогтоогдсон төлбөрийг төлж эрхийн зөвшөөрлийг /Lisence – лиценз/ сунгаснаар албан ёсоор дасгалжуулах, Дэлхийн Шатрын Холбооноос зохион байгуулагддаг томоохон тэмцээнүүдэд ДШХ-ны Зөвлөх дасгалжуулагч болон түүнээс дээш цолтой дасгалжуулагч нар эх орноо төлөөлөн баг, тамирчдаа ахлан оролцох гэх мэт эрхтэй болдог.
1. ДШХ-ны Ахлах дасгалжуулагч – FIDE Senior Trainer /FST/
2. ДШХ-ны Дасгалжуулагч – FIDE Trainer /FT/
3. ДШХ-ны Зөвлөх дасгалжуулагч – FIDE Instructor /FI/
4. Үндэсний зааварлагч багш – National Instructor /NI/
5. Хөгжүүлэлтийн зааварлагч багш – Developmental Instructor /DI/
