УИХ дахь АН-ын зөвлөл яг одоо мэдээлэл хийж байна. АН-ын зөвлөлийн дарга Д.Эрдэнэбат “АН-ын зүтгэлтэн, УИХ-ын дэд дарга агсан Г.Батхүү Төрийн ордон дотор амь насаа алдсан хэрэг явдал сунжирч байгаатай холбогдуулан ар гэрийнхэн нь өнгөрсөн долоо хоногт бидэнд захидлаар хандсан. Бид үүнийг хүлээж аваад УИХ-ын гишүүн Н.Номтойбаярын бүрэн эрхийг түдгэлзүүлэх Ерөнхий прокурорын саналыг яаралтай хэлэлцэх шаардлагыг УИХ-ын даргад хүргүүлсэн.
Өнгөрсөн баасан гарагт УИХ-ын гишүүний халдашгүй байдлын дэд хороо хуралдаж Н.Номтойбаярын бүрэн эрхийг түдгэлзүүлэх саналыг дэмжсэн шийдвэр гаргасныг Та бүхэн мэдэж байгаа. Энэ асуудал одоо Байнгын хороод, чуулганы нэгдсэн хуралдаанаар хэлэлцэгдэнэ. УИХ дахь АН-ын зөвлөл Н.Номтойбаярын УИХ-ын бүрэн эрхийг түдгэлзүүлэх саналыг дэмжинэ” гэж мэдэгдлээ.
