Үндэсний их баяр наадмаар хоёр дахь түрүүгээ авч Монгол Улсын аварга цол хүртсэн Э.Оюунболдоос дөрвөн төрлийн сэргээшийн бодис илэрсэн учраас барилдах эрхийг нь хоёр жилээр хассан. Ерөнхийлөгч зарлиг гаргаж аварга цолыг нь хураах ёстой ч бөхчүүдийн шээсний шинжилгээг авлига авч сольдог гэх асуудлаар нэр бүхий албан тушаалтнуудыг АТГ-т өгч шалгуулж байгаа учраас энэ хэрэг явдал удаарширсан.
Аварга Э.Оюунболд өөрийгөө хохирогч хэмээн мэдэгдэж, авлига авч бөхчүүдийн шээсний шинжилгээг будлиулдаг Сэргээшийн эсрэг төвийн зарим албан тушаалтнуудыг хуулийн байгууллагаар шалгуулж байгаа. Үүгээр ч зогсохгүй удахгүй болох Сар шинийн барилдаанд зодоглоно гэдгээ хэвлэлд ярьсан нь шуугиан дэгдээгээд байна. Сэргээшийн асуудалд орсон, наадмаар үзэгч түмнээ хуурсан үйлдэлтэй бөхчүүд барилвал эсэргүүцэл зарлана гэдгээ бусад бөхчүүд ч илэрхийлсээр байгаа юм.
Энэ асуудлаар Монголын үндэсний бөхийн холбоо албан ёсны хариулт өгчээ. Үндэсний их баяр наадмыг зохион байгуулах хорооны шийдвэрээр аварга Э.Оюунболдын барилдах эрхийг хоёр жилээр хассан тогтоол МҮБХ-нд ирсэн учраас энэ шийдвэрийг дагана. Тийм учраас аварга Э.Оюунболд Сар шинийн барилдаанд барилдах эрхгүй гэж МҮБХ-ны дэд тэргүүн Ц.Магалжав хэлсэн байна.
