УИХ-ын гишүүн Н.Номтойбаярын бүрэн эрхийг түдгэлзүүлэн шалгах Ерөнхий прокурорын санал УИХ-д ирсэн талаар өмнө нь мэдээлсэн. Хуульд зааснаар бол Ерөнхий прокурорын саналд 48 цагийн дотор хариу өгөх учиртай. Тиймээс УИХ-ын гишүүний халдашгүй байдлын дэд хороо яаралтай хуралдаж шийдвэрээ гаргана.
Халдашгүй байдлын дэд хороо УИХ-д хамгийн олон сонгогдсон 5 гишүүний бүрэлдэхүүнтэй. Үүнээс Гишүүн Ө.Энхтүвшин, Н.Энхболд, Ц.Нямдорж, Ч.Улаан нар хуралдаандаа суух боломжтой. Харин гишүүн Д.Лүндээжанцан гадаад улсад албан томилолттой байгаа ажээ. Ирц 50 хувиас дээш байгаа боловч Халдашгүй байдлын дэд хорооны хуралдаан тодорхойгүй шалтгаанаар хойшилсоор байна.
Н.Номтойбаяр бүрэн эрхтэйгээ үлдэх үү, халдашгүй байдлаасаа салах уу гэдгийг дээр нэр дурдсан гишүүд эхлээд дүгнэлтээ гаргаж, дараа нь УИХ-ын чуулганы нэгдсэн хуралдаанаар эцэслэн шийдэх цаг мөч тулж ирээд байна. Өмнө нь Ерөнхий прокуророос одоогийн 5 гишүүний бүрэн эрхийг түдгэлзүүлэн шалгах саналаа ирүүлсэн ч одоогийн УИХ нэмт хэрэгт нэр холбогдсон гишүүдээ хамгаалж үлдсэн юм. УИХ-ын гишүүний халдашгүй эрх мөрдөн шалгах ажиллагаанд тодорхой саад учруулдаг учраас түдгэлүүүлж шалгах саналыг Ерөнхий прокурор гаргадаг.