Сүүлийн үед нэлээн барцадтай байх болсон Н.Номтойбаярын УИХ-ын гишүүний бүрэн эрхийг түдгэлзүүлэн шалгах саналаа Улсын Ерөнхий прокурор УИХ-д ирүүлжээ. Эх сурвалжийн өгүүлснээр түүнийг хоёр ч хэрэгт холбогдуулан шалгаж байгаа бөгөөд халдашгүй дархан эрхийг нь түдгэлзүүлж шалгах шаардлагатай гэж хуулийн байгууллагынхан үзжээ. Ерөнхий прокуророос бичиг нэгэнт ирсэн тул УИХ-ын гишүүний Халдашгүй байдлын дэд хороо хуралдаж, Н.Номтойбаярын бүрэн эрхийг түдгэлзүүлэх саналыг хүлээн авах эсэхийг хэлэлцэн шийдвэрлэнэ.
Улсын ерөнхий прокуророос өмнө нь УИХ-ын гишүүн Б.Ундармаа, Д.Дамба-Очир, Г.Солтан, Л.Энхболд, Б.Батзориг нарын нарын таван гишүүний бүрэн эрхийг түдгэлзүүлэх санал ирүүлж байсан боловч УИХ татгалзсан удаатай. Энэ удаад Н.Номтой баярын бүрэн эрхийг түдгэлзүүлэх санал ирсэн нь одоогийн УИХ-ын 6 дахь гишүүний бүрэн эрх хөндөгдөж байгаа юм. Гишүүн Н.Номтойбаяр хөдөлмөр эрхлэлтийг дэмжих сангийн хөрөнгийг хуйвалдаж зарцуулсан, Г.Батхүү агсны үхлийн талаар худал мэдүүлэг өгсөн гэх хэрэгт холбогдоод байгаа билээ.
