Монголын Уулчдын үндэсний холбооны баг тамирчид БНСУ-ын Чонсон хотноо зохион байгуулж буй дэлхийн цомын тэмцээнд оролцож байна. Энэ сарын 10-нд нээлтээ хийсэн Чонсоны дэлхийн цомын тэмцээн Азийн аварга шалгаруулах тэмцээн давхар болохоороо онцлог. 2018 онд болсон тэмцээнээр ОУХМ Н.Хэрлэн, Д.Энхбаатар нар өвлийн спортын төрлөөр анхны мөнгө, хүрэл медалиудыг авчирч байсан юм.
Энэ жил эх орноо төлөөлөн оролцож буй ОУХМ Н.Хэрлэн мөсөнд авиралтын Ази тивийн аварга шалгаруулах тэмцээнээс хоёр дахь медалиа хүртэж, Монгол Улсын анхны алтан медалийг хүртлээ. Тэрбээр дэлхийн цомын тэмцээнд хоёр дахь удаагаа шагналт дөрөвдүгээр байрт шалгарчээ. Тэмцээнд дэлхийн 19 орны 105 тамирчин хурд, техник гэсэн хоёр төрөлд өрсөлдөж байна.
