ҮАБЗ-өөс ахмадуудын тэтгэврийн зээлийг нэг удаа тэглэх шийдвэрт хүрсэн талаар Ерөнхийлөгч Х.Баттулга он солигдох мөчид мэдэгдсэн. Энэ талаар Нийгмийн хамгаалал, хөдөлмөрийн сайд С.Чинзориг хэлэхдээ “Засгийн газраас тодорхой шийдвэрүүд гарах ёстой. Баялгийн хуваарилалтыг тэгш хүртээх асуудал бол дан ганц УИХ-ын бүрэн эрх байдаг. Тийм учраас эцсийн шийдвэрийг УИХ-аас гаргах байх. Монголбанкнаас тэтгэвэр барьцаалдаг зээлийн үйлчилгээг үндсээр нь өөрчлөх, болих асуудлыг удаа дараа тавьж байгаа” гэсэн юм.
Харин Сангийн сайд Ч.Хүрэлбаатар энэ талаар асуусан иргэнд твиттер хаягаараа дамжуулан хариулт өгчээ. Тэрбээр “Тэтгэврийн зээлийг тэглэх талаар Та бид хоёр яг адилхан мэдээлэлтэй байна. 2020 оны төсөвт тодотгол хийхгүй гэдгийг баттай хэлье” хэмээн бичжээ. Монголбанкнаас тэтгэврийн зээл нэмж олгохгүй, түр зогсоох чиглэлийг арилжааны банкуудад өнөөдөр өглөө. Үүнээс гадна тэтгэврийн зээлийн үлдэгдлийг тэглэх үү, хүүг цуцлах уу гэдэг дээр ойрын хугацаанд нэгдсэн шийдэлд хүрэх ёстой гэдгийг Монголбанкны ерөнхийлөгч хэлжээ.
