Монгол Улсын Ерөнхий сайд асан Ч.Сайханбилэгийг интерполоор эрэн сурвалжилж байна. Түүнийг АТГ-аас гурван хэрэгт эрүүгийн хэрэг үүсгэн шалгаж байгаа бөгөөд эрх мэдэл албан тушаалаа урвуулан ашиглаж, “Эрдэнэт” үйлдвэрийн 49 хувийг ОХУ-аас худалдаж авах үйл ажиллагаанд гар бие оролцсон, Оюутолгой компанийг илтэд хууль зөрчиж, татвараас чөлөөлсөн, Дубайн гэрээ гэсэн гурван асуудлаар шалгаж байв.
Тэрээр биеэ эмчлүүлнэ хэмээн гадагшаа гарсан боловч АТГ-аас хүсэлт гаргасны үндсэн дээр мөрдөн байцаалтын шатанд гадаад руу оргон зайлж, зугтаасан гэх үндэслэлээр Олон улсын эрүүгийн цагдаагийн газар буюу Интерполоор эрэн сурвалжилж эхэлсэн байна.
Түүнийг одоогоос жил гаруйн өмнө буюу 2018 оны дөрөвдүгээр сард Авлигатай тэмцэх газраас баривчилж, Шүүхийн шийдвэр гүйцэтгэх ерөнхий газрын харьяа Урьдчилан хорих 461 дүгээр ангид нэг сар саатуулсан. Улмаар цагдан хорих хугацаа дуусмагц Прокурорын байгууллагаас хугацааг сунгах саналыг шүүхэд хүргүүлсэн ч нийслэлийн Чингэлтэй дүүргийн Эрүүгийн хэргийн анхан шатны шүүхээс түүнд авсан таслан сэргийлэх арга хэмжээг өөрчилж, хилийн хориг тавьж, батлан даалтад гаргаад байсан юм.
