Их эзэн Чингис хааны мэндэлсэн “Монгол бахархал”-ын өдөрт зориулсан чансаа өндөр 128 бөхийн барилдаан сонирхолтой болж өндөрлөлөө. Улсын аварга Н.Батсуурь, улсын арслан П.Бүрэнтөгс нар зүүн, барууны магнайд зогссон энэ удаагийн барилдаанд улсын аварга Ч.Санжаадамба, улсын арслан Ц.Содномдорж нарын бөхчүүд зодоглосонгүй.
Хүчит бөхийн барилдааны шөвгийн дөрөвт улсын аварга Н.Батсуурь улсын начин Б.Орхонбаярыг амлан авснаар улсын харцага О.Хангай улсын начин Н.Баярбаатар нар тунан барилдав. Сэлэнгэ аймгийн харьяат улсын начин Б.Орхонбаяр, Н.Баярбаатар нар учраа бөхөө өвдөг шороодуулснаар нутгийн хоёр залуу үзүүр түрүү булаалдлаа.
Улсын начин Н.Баярбаатар учраа бөхөө давснаар чансаа өндөр бөхчүүдийн барилдаанд анх удаа түрүүллээ. Тэрбээр нутаг нэгт Б.Орхонбаяраас гадна улсын харцага Б.Бат-Өлзий, О.Хангай нарыг дараалан хаяж бэлтгэл сургуулилт сайтай байгаагаа харуулсан юм.
