57 настай Солонгос эр, 29 настай вьетнам эхнэрээ хутгалж хөнөөж цогцсыг нь хээр булсан хэрэг БНСУ-ын Ванжу тосгонд гарчээ. Тэрээр эхнэрээ алга боллоо гэсэн дуудлагыг цагдаад өгсөн ч хэргийн явцад өөрөө олон удаа хутгалж хөнөөсөн нь нотлогдсон байна. Тэрээр, эхнэртэйгээ таарамжгүй байсан, тэр намайг орхиж явах гээд байсан тул ийм алхам хийсэн гэж хэлжээ. Тэд 2017 онд танилцаж гэрлэсэн бөгөөд дундаасаа хүүхэдгүй байжээ.
Манай охид бүсгүйчүүд ч солонгос иргэдтэй гэр бүл болсон тохиолдол цөөнгүй бий. Тэгвэл цагдаагийн байгууллага сүүлийн үед гэр бүлийн хүчирхийлэл нэмэгдэж, тэр дундаа цагаач эхнэртэй гэр бүлд ийм төрлийн гэмт хэрэг ихээр гарч хүний амь хохирсоор байгаа нь нийгмийн ноцтой асуудал болоод байгааг онцолсон байв. Өнгөрсөн долдугаар сард ч нэгэн вьетнам бүсгүйг нөхөр нь зэрлэгээр хөнөөсөн нь вьетнамуудын эгдүүцлийг хүргэж БНСУ-ын Ерөнхий сайд тус улсын Нийгмийн аюулгүй байдлын сайдаас хүлцэл өчиж байсан билээ.
