“Хайрхан” аялагч клубээс санаачлан жил бүр уламжлал болгон уулын аяллын клубүүдийн хооронд зохион байгуулдаг уулын эрчимт алхалтын багийн тэмцээн энэ сарын 21-ний бямба гарагт зохиогдох юм байна. Тус тэмцээн энэ жилээс улсын аваргын статустай болж байгаа ажээ. Монголын уулчдын үндэсний холбооноос тус тэмцээний статусыг дээшлүүлэх хүсэлтийг БОАЖЯ-нд хүргүүлж нааштай хариу авсан юм байна.
Уулын алхалт аяллыг нийтэд сурталчилах, олон нийтийг хамруулах, клубүүдийн аялах, алхах ур чадварыг дээшлүүлэх, уулын алхалтын клубүүдэд алхагчдыг нэгтгэх зорилготой уг тэмцээн нь 6 дахь жилдээ ийнхүү Богдхан уулын Манзуширын хийдээс Зайсангийн ам гэсэн 17.5 км зайг багаараа хамгийн бага хугацаанд туулах уламжлалт замаараа зохиогдоно.
