Налайх дүүргийн иргэд, оршин суугчид болон аж ахуйн нэгжүүд, төрийн байгууллагууд хамтран өөрсдийн нөөц бололцоогоор хандив цуглуулан сар хүрэхгүйн хугацаанд шинэ “Цэнгэлдэх хүрээлэн” байгуулах ажлыг өрнүүлжээ. Нийслэлийн Засаг дарга бөгөөд Улаанбаатар хотын Захирагч С.Амарсайхан өчигдөр /2019.07.05/ Налайх дүүрэгт ажиллах үеэрээ энэхүү бүтээн байгуулалтыг үзэж сонирхон, дүүрэгтээ баригдсан олон улсын хөнгөн атлетикийн тартан замыг түшиглэн Цэнгэлдэх хүрээлэн байгуулаад буй налайхчуудад амжилт хүслээ.
Цэнгэлдэх хүрээлэнгийн энэхүү бүтээн байгуулалт нь Налайх дүүргийн иргэдийн чин хүслээр хийгдэж байна. Энэ ажил улс, нийслэлийн төсвийн хөрөнгөөр огт хийгдээгүй. Зөвхөн иргэд болон байгууллагуудын ажилтан, албан хаагчдын хандив тусламж болон уурхайчин залуусийн дэмжлэг, туслалцаатайгаар их ажлыг өрнүүлж байна гэдгээ Налайх дүүргийн Засаг дарга Ч.Раднаабазар хэлсэн юм.
Нийслэлийн Засаг дарга бөгөөд Улаанбаатар хотын Захирагч С.Амарсайхан “ Иргэд олон нийт хүчээ нэгтгэн, санал санаачлага гарган дүүргийнхээ хөгжил цэцэглэлт, ирээдүйн бүтээн байгуулалтын төлөө ийм сайхан ажил өрнүүлж, Үндэсний их баяр наадмын өмнө ашиглалтад оруулахаар сэтгэл, зүтгэл гарган ажиллаж байгааг харахад баяртай байна. Налайх дүүргийн иргэд үлгэр жишээ байж, төсвийн хөрөнгө мөнгө харалгүйгээр өөрсдийнхөө нөөц бололцоогоор бүтээн байгуулалт хийж болдгийг харуулж чадлаа” гэдгийг онцолж хэлээд хотын Захирагчийн зүгээс дэмжиж ажиллана гэдгээ илэрхийлэв.
Энэхүү бүтээн байгуулалтын санаачилгыг дүүргийн ИТХ, ЗДТГ болон төрийн байгууллагууд түүчээлэн дэмжиж, ажилтан, албан хаагчид нэг өдрийн цалингаа хандивлаж, дүүргийн нутаг дэвсгэрт үйл ажиллагаа явуулж байгаа хувийн хэвшлийн байгууллагууд, иргэд, төгсөлтийн холбоод болон хувь хүмүүсийн чин сэтгэлийн хандив, хамтын хүчээр Налайхчууд шинэ “Цэнгэлдэх хүрээлэн”-дээ баяр наадмаа хийхээр шуурхайлан ажиллаж байна.
