“Huawei” компанийн бүтээгдэхүүнүүдийг хэрэглэх нь танай улсын аюулгүй байдалд сөргөөр нөлөөлж болзошгүй. Иймээс “Huawei” компанийн бүтээгдэхүүнээс татгалзах санаачилгад нэгдэхийг АНУ-ын тал БНСУ-ын Гадаад хэргийн яаманд уриалсан талаар Чосун Илбо сонин мэдээлжээ. Ийм уриалгыг АНУ-ын зүгээс БНСУ-д удаа дараа ирүүлсэн гэсэн албан бус мэдээлэл байгааг ч тус сонин дурджээ.
Мөн АНУ-ын тал саяхан “Huawei” компанийн зарим хэрэгсэл тоноглолуудыг ашигладаг Өмнөд Солонгосын LG Uplus корпорацийн төлөөлөлтэй уулзах үеэрээ ийм хэрэгсэл тоноглол ашигласан бүтээгдэхүүнээ БНСУ-ын гол газар, байршлуудад ашиглахгүй байхыг анхааруулсан байна.
Түүнчлэн Америкийн цэргийн объектууд байрладаг дүүргүүдэд “Huawei”-н тоног төхөөрөмж бүхий хөдөлгөөнт холбоог хэрэглэхээс татгалзахыг БНСУ-ын эрх баригчдаас АНУ шаардаж байгаа аж
АНУ, БНСУ нь маш сайн харилцаатай холбоотон орон ч гэлээ БНХАУ ч бас БНСУ-ын хамгийн том экспортын түнш тул өмнөдийнхний зүгээс тийм ч тодорхой байр суурь илэрхийлээгүй байгаа юм. БНСУ-ын Гадаад хэргийн сайд Вашингтон, Сөүл энэ асуудлаар үргэлжлүүлэн ярилцана гэсэн байр суурийг илэрхийлжээ. Гэхдээ эрх баригчид хувийн бизнесийн хэрэгт хөндлөнгөөс оролцож чадахгүй гэдгийг онцлон тэмдэглэсэн байна.
