Пакистан улсад бага насны хүүхдүүд олноороо ДОХ-ын халдвар авсан харамсалтай тохиолдол гарчээ. Тус улсын Ротадеро тосгоны Синдх гэх газрын хүүхдүүд ДОХ-ын халдвар авсан байна. Тодруулбал, одоогоос сарын өмнө Ратодеро тосгоны эцэг, эхүүд хүүхдээ тогтмол халуурч, эм өгсөн ч халуун нь буурахгүй байна гэх ижил шалтгаанаар хүүхдүүдээ эмнэлэгт үзүүлсэн байна. Цусны шинжилгээгээр найман хүүхэд бүгд ДОХ-ын халдвар авсан нь тогтоогдсон байна. Үүнээс хойш 18418 хүн шинжилгээ өгснөөс 607 нь халдвар авсан гэсэн хариу сонссон бөгөөд хамгийн аймшигтай нь тэдний 381 нь ямар ч гэм зэмгүй 5 хүртэлх насны хүүхэд байжээ.
Одоогоор хүүхдүүд яагаад ийнгэж олноороо халдвар авсан шалтгааныг тодорхой болгоогүй байгаа ч тариур, зүүнээс халдвар тархсан гэж үзэж байгаа юм байна. Учир нь тус улсын тосгодын иргэд өвчилсөн үедээ тариа, дусал хийлгэхийг эм ууснаас илүүд үздэг байна. Мөн Пакистаны эрүүл мэндийн систем муугаас мэргэжлийн бус, эмч дом нар мэргэжлийн эмч нарын орон зайг дүүргэн хяналтгүй ажилладаг нь ийм байдалд хүргэсэн гэж дүгнэж байгаа аж.
НҮБ-ын Дархлалын олдмол хомсдлын асуудал хариуцсан хөтөлбөрийн эмч, захирал Мариа Элена Филио Борромео “Энэ бол урьд өмнө гарч байгаагүй тохиолдол. Учир нь халдвар авсан хүмүүс бүгд жаахан хүүхдүүд ” гэж хэлжээ.
НҮБ-аас тооцоолсноор 150 мянган ДОХ-ын халдвартай хүн тус улсад бий бөгөөд энэ тоо жил бүр 20 мянгаар өсч байгаа гэнэ. Гэвч 50 эмэгтэйн нэг нь , 25 эрэгтэйн нэг нь л шинжилгээнд хамрагддаг байна.
2018 онд Пакистанд 6200 хүн ДОХ-ын өвчлөлөөс болж нас баржээ.
