УИХ-ын дэд дарга асан Г.Батхүү Төрийн ордонд зуурдаар нас барсан хэргийн талаар АН өнөөдөр мэдээлэл хийж, байр сууриа илэрхийллээ. Тус намын Ерөнхий нарийн бичгийн дарга Ц.Туваан бидэнд энэ хэргийг улстөржүүлэх, ашиг хонжоо хайх ямар ч хүсэл сонирхол байхгүй. Хамгийн гол нь талийгаачийн амь насаа алдсан байдлыг үнэн зөвөөр тогтоож, нийгэмд худал ташаа мэдээлэл зохион байгуулалттайгаар тарааж байгаагийн эсрэг байгаа юм гэлээ. АН-ын дэд дарга Х.Тэмүүжингийн хэлснээр бол талийгаач Г.Батхүү өөд болохынхоо өмнө УИХ-ын гишүүн С.Эрдэнэтэй уулзсан гэсэн мэдээлэл ор үндэсгүй, зорилготойгоор тарааж байгаа цуурхал ажээ.
Талийгаач Г.Батхүү нас барахаасаа 20 минутын өмнө МАН-аас нэр дэвшиж сонгогдсон УИХ-ын нэгэн гишүүнтэй өрөөнд нь уулзсаныг тогтоожээ. Төрийн ордны Засгийн газрын хуралдаан болдог хэсгийн гонхноос унаж ихээхэн бэртэл авч нас барсныг АН-ынхан энэ үеэр хэллээ. Хүн өөрөө тэр өндрөөс унах ямар ч нөхцөлгүй учраас талийгаачийн үхэл гаднын нөлөөтэй байж магадгүй гэж АН хардаж байгаа юм байна. Хууль хяналтын байгууллагууд шуурхай, шударга ажиллаж хэргийг үнэн зөвөөр нь илрүүлэхийг АН цаашид шахаж шаардах юм байна. Юутай ч УИХ-ын дарга асан Г.Батхүү шатнаас унаагүй, зүрх нь зогссон шалтгаанаар нас бараагүй нь тодорхой боллоо.
