Нийслэлийн нутгийн захиргааны таван байгууллагын 47 үйлчилгээг цахим хэлбэрт шилжүүлэх, нэгдсэн системд оруулах ажлын хүрээд нийслэлийн цахим үйлчилгээний нэгдсэн портал eservice.ulaanbaatar.mn сайтаар дамжуулж иргэд төрийн үйлчилгээг цахимаар авах нөхцөл бүрджээ.
Энэ хүрээнд Байгаль орчны газрын зүгээс эхний ээлжинд байгаль орчны дүгнэлт гаргах, цооног өрөмдөх, худаг гаргах зөвшөөрөл авах хүсэлтүүдийг цахимжуулжээ. Гүний худгийн компаниуд хууль зөрчих, тусгай зөвшөөрөл аваагүй байдлаас үүдэн иргэдийг хохироох асуудал удаа дараалан гардаг байсан бол Еservice.ulaanbaatar.mn систем нэвтэрсэнээр энэ чиглэлээр үйл ажиллагаа явуулж байгаа аж ахуй нэгж, компаниудыг бүртгэх, тусгай зөвшөөрлийн хугацаа, бичиг баримтын бүрэн бүтэн байдал бүгд цахимд оржээ. Ингэснээр хамгийн гол нь иргэд чирэгдэлгүйгээр, албан тушаалтнаас хамааралгүйгээр шуурхай үйлчилгээ авах боломж бүрдсэн гэ албаны хүмүүс хэллээ.
Цахимаар зөвшөөрөл хүсэхийн тулд Еservice.ulaanbaatar.mn системээр нэвтэрч өөрийгөө цахим орчинд нотолсны дараа үйлчилгээ авах хүсэлтээ гаргах бөгөөд хэрхэн нэвтрэх тухай видео гарын авлага үндсэн хуудастаа байршуулжээ. Цахим систем ашиглах боломжгүй иргэд маань үйлчилгээний нэгдсэн төвүүдэд хандаад материалаа өгөөд хүсэлтээ гаргаж болох аж.
