Нийслэлийн Хан-Уул дүүрэгт байрлах түргэн хоолны “KFC” Зайсан дахь салбараар энэ сарын 9-11-нд үйлчлүүлсэн 80 орчим иргэн хоолны хордлогод орж одоогоор 20 гаруй иргэн Халдварт өвчин судлалын үндэсний төвд хэвтэн эмчлүүлж байгаа юм байна. Анх нэг гэр бүлийн 5 хүн хордлогын шинж тэмдэгтэйгээр эмнэлэгт хандсанаар энэ хэрэг ил болсон юм. Энэ талаарх мэдээлэл нийгмийн сүлжээгээр тарж, хордлогын шинж тэмдэг илэрсэн хүмүүс эмнэлэгт хандах сэрэмжлүүлгээс хойш хордлогын шинж тэмдэгтэй хүмүүсийн тоо улам бүр нэмэгдсээр байгаа ажээ.
Тухайн өдрүүдэд тус салбараар үйлчлүүлж хордлогод орсон иргэд соусны амт нэг л биш байсан талаар хэлсэн байна. Гэвч одоогоор шинжилгээний эцсийн хариу гараагүй байгаа бөгөөд хариу өнөө орой гарна гэж мэргэжлийн хяналтын байгууллагаас хариу өглөө. ХӨСҮТ-ийн эмч нар нянгийн гаралтай хоолны хордлого байж болзошгүй гэсэн урьдчилсан дүгнэлттэй байгаа юм. Хэрэв тийм бол тухайн үед Зайсан салбараар үйлчлүүлсэн одоогоор хөнгөн шинж тэмдэгтэй байгаа хүмүүсийн өвчин хүндэрч ирж болзошгүй гэж эмнэлгийн хүмүүс хэлж байв.
Мэргэжлийн хяналтын газраас өгсөн мэдээллээр “KFC” Зайсан дахь салбараас 52 дээж ирсэн бөгөөд одоогийн байдлаар бүрэн шинжилж дуусаагүй байгаа аж. Эхний шинжилсэн дээжнээс нь халуунд тэсвэртэй нян, хадгалалтын хугацаа уртасгадаг бодис буюу нитрит илэрсэн юм байна.
Энэ талаар “KFC” сүлжээ хоолны газрын Монгол дахь албан ёсны хариуцагч Таванбогд групп болон Зайсан салбар ямар нэгэн мэдээлэл өгөхөөс татгалзлаа.
