Гадаад паспортын хүчинтэй хугацаа дууссан тохиолдолд сунгаж үргэлжлүүлэн ашигладаг байсныг бид мэднэ. Тэгвэл цаашид гадаад паспорт сунгах гэсэн ойлголт үгүй болжээ. Энэ талаар энэ сарын 22-ны өдрийн Засгийн газры ээлжит хуралдаанаар хэлэлцэж шийджээ. Монгол Улсын дипломат, албан паспорт олгох, эзэмших, хадгалах журмыг хуралдаанаар шинэчлэн баталсан бөгөөд энэхүү журам 2018 оны 11 дүгээр сарын 1-ний өдрөөс эхлэн мөрдөгдөх юм байна.
Монгол Улс нь гадаад паспортын хүчинтэй хугацааг гар аргаар сунгахгүй байх тухай Олон улсын иргэний агаарын тээврийн байгууллага (ICAO)-ын холбогдох зөвлөмж, стандартын дагуу 2018 оны 1 дүгээр сарын 1-ний өдрөөс эхлэн паспортад сунгалт хийхээ албан ёсоор зогсоосон бөгөөд одоо хэрэгжиж байгаа “Монгол Улсын дипломат албан паспорт, буцах үнэмлэх олгох, эзэмших, хадгалах” журмаар дипломат, албан паспортыг 5 хүртэл жилийн хугацаатай олгоно гэж заасан.
Иймд дээр дурдсан үндэслэлээр 5 жилийн хүчинтэй хугацаа нь дуусгавар болж байгаа 2013 оны 9 дүгээр сарын 30-ны өдөр хүртэл олгогдсон нийт дипломат, албан паспорт 2018 оны 10 дугаар сарын 1-ний өдрөөс эхлэн хүчингүй болохыг мэдэгдэж байна гэж Гадаад харилцааны яамнаас мэдээллээ.
