Хуурамч урамшууллын зар байршуулж, иргэдийн интернет банкинд фишинг халдлага үйлддэг бүлэг этгээдүүдийг илрүүлжээ. Тодруулбал, тухайн этгээдүүд нь Хаан банкны 35 жилийн ойн урамшуулал болон арилжааны банкны судалгаа нэртэй хуурамч зар мэдээллийг цахим орчинд байршуулж иргэдийн анхаарлыг татах замаар хортой фишинг веб сайт руу хандуулж, интернет банкных нь нэвтрэх нэр, нууц үгийг нь хуулбарлан авдаг байжээ. Улмаар данс руу нь хууль бусаар нэвтэрч мөнгө хулгайлдаг байсан ба уг хэрэгт гадаад улсын 1, Монгол Улсын 4 иргэн холбогдон шалгагдаад байгаа юм.
Тухайн этгээдүүд нь гадаад улсын цахим гэмт бүлэглэлийн санхүүжилт, холбоо хамаарлыг ашиглан хэргээ үйлддэг байжээ. Ингэхдээ Монгол Улсын иргэдтэй гадаадад аялах, суралцах явцад нь танилцаж, урт хугацааны харилцаа тогтоосон байна. Улмаар тэдэнд бэлэн мөнгө болон эд зүйл амлах замаар гэмт хэрэгтээ татан оролцуулдаг байсныг цагдаагийн байгууллагаас тогтоожээ.
Мөрдөн шалгах ажиллагааг Нийслэлийн Хан-Уул дүүргийн прокурорын газрын хяналтад явуулж, прокурорын зөвшөөрлөөр холбогдогчдын орон байр, биед нэгжлэг хийжээ. Ажиллагааны явцад иргэдийн интернет банк руу хууль бусаар халдсан болон халдахаар бэлтгэж байсан биет нотлох баримтуудыг илрүүлэн хэрэгт эд мөрийн баримтаар тооцсон байна.
Цаашид холбогдогчдод Эрүүгийн хуулийн 26.1 дүгээр зүйлийн 2 дэх хэсэгт заасан “Кибер орчинд хууль бусаар халдах”, 17.1 дүгээр зүйлийн 1 дэх хэсэгт заасан “Хулгайлах” гэмт хэргээр хэрэг үүсгэн, яллагдагчаар татах саналтайгаар шалгалтыг үргэлжлүүлээд байгаа юм.
Сүүлийн үед хуурамч веб хуудас, мессеж, цахим шуудан болон сошиал хаягаар дамжуулан иргэдийн интернет банкны нэвтрэх нэр, нууц үг, нэг удаагийн кодыг хуулбарлан авдаг фишинг халдлага нэмэгдэж байна. Иймд иргэд хувийн мэдээллийн аюулгүй байдалдаа анхаарч, сэжигтэй холбоос руу нэвтрэхгүй байх хэрэгтэй. Хэрэв сэжигтэй холбоосоор нэвтэрч нууц үг, кодоо оруулсан бол нэн даруй банктайгаа холбогдон дансаа блоклож, нууц үгээ сэргээн цагдаагийн байгууллагад мэдээлэхийг анхааруулж байна.
