Нийслэлийн Засаг даргын зөвлөлийн хуралдаан болжээ. Энэ үеэр хотын дарга Б.Пүрэвдагва ерөнхий төлөвлөгөөний үзэл баримтлалаа намар танилцуулна гэсэн байна.
Ингэхдээ амьдарч байгаа газар нь ойрын хугацаанд дахин төлөвлөлтөд орох эсэх зэрэг мэдээллийг тодорхой болгосноор иргэд ажил, амьдралаа төлөвлөхөд хүндрэл чигрэгдэлгүй байх болно гэж үзэж байгаагаа илэрхийлжээ. Мөн Улаанбаатар хотын дараагийн төлөвлөгөөний талаар ойлгомжтой, тодорхой мэдээлэл хүргэснээр хувийн хэвшил хөрөнгө оруулалтын төлөвлөгөөгөө тооцоолно гэжээ.
Хотын дарга Б.Пүрэвдагва “Иргэд газар нь дахин төлөвлөлтөд орох эсэх нь мэдэгдэхгүй байгаа учраас байшингаа засаж сайжруулж, зарж борлуулж чадахгүй нөхцөл байдал үүсдэг байна. Мэдээллийг сайн өгч байж иргэд ирээдүйгээ төлөвлөнө. Хотын төлөвлөлт тодорхой байх ёстой. Хотын Ерөнхий архитектор, хотын стандарт хариуцаж байгаа албан тушаалтнууд үүнд анхаараарай. Энэ бүхэн ерөнхий төлөвлөгөөн дээр суурилна. Нийслэл ч тэр, Хот байгуулалт, барилга, орон сууцжуулалтын яам ч ерөнхий төлөвлөгөөгүй явж байна” гэв
