Толгойтын авто замаас Ард Аюушийн өргөн чөлөө хүртэлх авто замын ажлын хүрээнд Ард Аюушийн өргөн чөлөөнд өнгө хучилтын ажлыг гүйцэтгэнэ. Хучилтын ажлыг гүйцэтгэхдээ зорчих хэсгийг хэсэгчлэн хаана гэж Нийслэлийн Замын Хөгжлийн Газраас мэдэгдлээ.
Тодруулбал маргааш буюу наймдугаар сарын 6-ны 07:00 цагаас наймдугаар сарын 9-ний 00:00 цаг хүртэл иргэдийн нэрлэж заншсанаар Толгойтын авто замыг Гэмтлийн эмнэлэг, 3, 4 дүгээр хороололтой холбосон авто замын хөдөлгөөнийг хаана. Энэ хугацаанд тээврийн хэрэгслүүдийг түр замаар зорчуулахаар зохицуулжээ.
Авто замын өнгө хучилтын ажлыг “Монгол зам групп” ХХК гүйцэтгэх ажээ.
Толгойтын авто замаас Ард Аюушийн өргөн чөлөөтэй холбосон 3.9 км авто замыг 2022-2026 онд барих нийт төсөвт өртөг нь нийслэлийн төсвийн 74.2 тэрбум төгрөг бөгөөд энэ оны есдүгээр сард бүрэн дуусгана хэмээн албаныхан мэдээлээд байгаа юм.
