Улаанбаатар хотынхоо өнгө үзэмжийг сайжруулах, илүү цэвэрхэн, тухтай орчныг бүрдүүлэх зорилгоор Volunteer Mongolia байгууллагын сайн дурын залуус нэгдэн “Цэмбэгэр Улаанбаатар” давлагааг өрнүүлээд байна.
Өнөөдөр 300 гаруй сайн дурын залуус Төв номын сангийн гадна талбайг хамтдаа угааж, цэвэрлэлээ. Цэмбэгэр Улаанбаатар давалгаа энэ зуны турш үргэлжлэх юм.
Volunteer Mongolia-ийн сайн дурын залуус нийслэл хотод үйл ажиллагаа явуулж буй аж ахуйн нэгж, байгууллага бүрийг өөрсдийн гаднах талбайгаа угааж, цэвэрлэхийг уриалж байна.
Энэ бол аж ахуйн нэгж, байгууллага бүр өөрийн оффис, үйлчилгээний газрын гаднах болон ойр орчмын 50 метр доторх явган хүний зам, нийтийн талбайгаа угааж цэвэрлэн, хотын соёлыг түгээх уриалга юм.
Аж ахуйн нэгж, байгууллагууд нь Нийслэлийн Иргэдийн төлөөлөгчдийн хурлын 2009 оны 63 дугаар тогтоолоор үйл ажиллагаа эрхэлж буй байршлынхаа ойр орчмын 50 метр хэсгийн эрүүл ахуй, цэвэр цэмцгэр байдлыг хангах үүрэг хүлээдэг. Иймд аж ахуйн нэгж, байгууллагуудыг “Цэмбэгэр Улаанбаатар” давалгаанд нэгдэж, орчин тойрныхоо цэвэр цэмцгэр байдлыг хангахыг залуус уриалж байна.
