Нийслэлийн Засаг дарга бөгөөд Улаанбаатар хотын Захирагч Б.Пүрэвдагва нийслэлийн Баянзүрх дүүргийн 43 дугаар хорооны иргэдийн гомдлын дагуу газрын маргааны асуудлыг шийдвэрлэхээр Натур төв орчимд ажиллаж байна. Оршин суугчид эрүүл, аюулгүй амьдрах эрх зөрчигдлөө хэмээн үзэж орон сууцны барилга барихыг эсэргүүцсэн юм.
Хотын дарга Б.Пүрэвдагва хэлэхдээ “Нийслэлийн иргэдийн эрүүл, аюулгүй орчинд амьдрах эрхийг хангах нь миний үүрэг. Тийм учраас та бүхнээс ирүүлсэн гомдлыг судалж үзээд энд байршилд орон сууцны барилга бариулахгүй байхаар шийдвэрлэлээ. Барилгын компани тодорхой хөрөнгө зарццулж ажил хийсэн байгаа тул хэлцэл хийж, хохиролгүй болгоно” гэв.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва барилгажих талбайн газар олголтууд хуульд нийцсэн эсэхийг судалж дүгнэлт гаргах шуурхай Ажлын хэсэг байгуулснаа энэ үеэр мэдэгдэв. Хэрэв хууль зөрчсөн нь тогтоогдвол газрын эрхийг нь цуцлах хүртэл шийдвэртэй алхам хийнэ гэж хэллээ.
