Хонконгийн орон сууцны хороолол шатаж өнөө өглөөний байдлаар галд амиа алдсан хохирогчдын тоо 94 болжээ. Мөн 70 гаруй хүн гэмтэж бэртсэнээс 11 нь гал сөнөөгчид байна.
Гал түймэр эхэлснээс хойш аврах албаныхан нийт 55 хүнийг галаас аварчээ. Орон сууцны хороолол нь 31 давхар найман барилга бүхий орон сууцуудтай байсан бөгөөд галд долоон барилга шатсан юм .
Нийт 2,000 айлын 4,600 оршин суугчтай байсан ба одоогоор 270 оршин суугч сураггүй хэвээрээ байна. Галаас эсэн мэнд үлдсэн хүмүүс түр орогнох байранд байгаа бөгөөд Хонконгийн эрх баригчид орон гэрээ алдсан хүн нэг бүрт 1,200 ам.долларын нэг удаагийн нөхөн төлбөрийг эхний ээлжинд олгох шийдвэрийг гаргажээ.
Орон сууцны хороололд гал гарах үед барилгын засварын ажил хийгдэж байсан. Гал хаанаас хэрхэн асаж эхэлсэн болохыг одоогоор олж тогтоогоогүй байна
Барилгын засварын ажлыг гүйцэтгэх явцдаа ашигласан шатамхай материалууд нь гал асаж, тархах гол шалтгаан болсон гэж урьдчилан дүгнэсэн байна. Тхайлбал барилгын ажилд хулсан шатыг ашиглаж байсан ба энэ хэргийн дараа Хонконгийн эрх баригчид хулсан шатны хэрэглээг хориглох шийдвэр гаргахаар хэлэлцэж эхэлжээ.
Хонконгийн цагдаа нар уг хэрэгт гэм буруутай гэж үзэж барилга, инженерийн компаниудын гурван гүйцэтгэх захирлыг баривчлан саатуулаад байгаа юм. Тэднийг сонор сэрэмж алдсан, хүн амины гэмт хэрэг үйлдсэн зэрэг хэргүүдэд буруутгаж байнаа юм.
