Аймаг, нийслэл, сум, дүүргийн иргэдийн Төлөөлөгчдийн 2025 оны нөхөн сонгууль 6 дугаар сарын 22-ны өдөр Улаанбаатарын цагаар 07.00-22.00 цагт болно. Энэ жилийн тухайд 2 аймгийн иргэдийн Төлөөлөгчдийн Хурал, 17 аймгийн 52 сумын иргэдийн Төлөөлөгчдийн Хуралд нөхөн сонгууль товлогдсон бөгөөд 63 мандатад 121 нэр дэвшигч өрсөлдөхөөр аймаг, сумын сонгуулийн хорооноос өнөөдөр нэр дэвшигчийн үнэмлэхээ авчээ. “Аймаг, нийслэл, сум, дүүргийн иргэдийн Төлөөлөгчдийн Хурлын 2025 оны нөхөн сонгууль зохион байгуулах цаг хугацааны хуваарь”-ийн дагуу нэр дэвшигчдийн үнэмлэхээ авснаар сонгуулийн сурталчилгаагаа эхлүүлж, 6 дугаар сарын 20-ны өдөр дуусгана.
Түүнчлэн Сонгуулийн ерөнхий хорооны хуралдаанаар “Саналын хуудсыг хэвлүүлэх, хүргүүлэх, хадгалах, хамгаалах журам”-д сонгогчдын тооноос хамаарч саналын хуудасны нөөц тогтоох талаар нэмэлт оруулжээ.
