Засгийн газрын хуралдаанаас гаргасан шийдвэрийн талаар Шадар сайд С.Амарсайхан мэдээлэл хийлээ. Тэрээр “Нэгдүгээр сарын 23-нд Баянзүрх дүүргийн 26 дугаар хороонд гарсан ноцтой осол гарсан. Энэ хүрээнд Засгийн газрын зүгээс тодорхой шийдвэрийг гаргалаа. Нэгдүгээрт, албан үүргээ биелүүлж байгаад амиа алдсан албан хаагчдын ар гэрт олгох, мөнгөн тусламж тэтгэмжийн асуудлыг шийдвэрлэлээ.
Хоёрдугаарт, осол гэмтлийн улмаас түлэгдэж, угаартаж, эмнэлэгт эмчлүүлж байгаа иргэдийн эмчилгээнд зориулсан тодорхой санхүүжилт, ар гэрт нь дэмжлэг үзүүлэх асуудлыг шийдвэрлэнэ. 60 айлын орон сууцыг засахтай холбоотой зардлыг Засгийн газрын нөөц хөрөнгөөс шийдвэрлэж байгаа. Орон сууцыг засварлах хугацаанд айл өрх, иргэдийн түрээсийн байрын зардлыг мөн шийдвэрлэлээ. Үүнд 1.4 тэрбум төгрөг төсөвлөөд байна. Энэ ажлыг Нийслэлийн Засаг даргын Тамгын газар хариуцна. Шатсан автомашиныг буруутай этгээдээр төлүүлэх эсэх асуудлыг хуулийн байгууллага шийдвэрлэнэ. Ослыг мэргэжлийн байгууллагаас шалгаж байгаа” гэв.
